ENCORO DE BELESAR (CHANTADA)
A colosal obra de enxeñaría do Encoro de Belesar impón desde fóra, pero imaxina poder acceder ás súas entrañas. Unha visita excepcional para descubrir a historia e funcionamento dunha das maiores centrais hidroeléctricas do país.
Pazo e igrexa de San Pedro de Bembibre (Taboada)
O pazo-fortaleza, fundado no século XV polos Condes de Taboada, sorprende coa súa torre ameada e un fermoso patio con arcadas. Poderemos visitar a tumba dun destes señores no interior da igrexa románica, unha xoia medieval con pinturas murais e outras sorpresas.
NEVEIROS de Piñeira (Monforte)
Por primeira vez ábrese ao público a sorpren dente bóveda descuberta en Piñeira. Neste monumental “frigorífico” do século XVII, vinculado aos Condes de Lemos, conservábase o xeo para usos medicinais e de luxo, aproveitándose despois como adega.
Fonte do balneario da Ferrería (O Incio)
Este gran hotel balneario de 1892, construído sobre terreos do Conde de Campomanes, foi o refuxio de veraneo da alta sociedade atraída polas súas famosas augas ferruxinosas. Na visita fixemos un percorrido pola aldea acompañados de Aurora, antiga traballadora do hotel, para chegar a entrar na Fonte das Augas Rubias.
Cova de Santalla de Lóuzara (Samos)
Comparte moitas características coas grutas calcarias da serra do Courel, na mesma área xeolóxica. No seu interior, o tempo e a auga labraron espectaculares formacións cársticas ao longo de milenios, conformando un atractivo e sorprendente espectáculo visual.
Mananciais de Mondoñedo
Un tesouro agochado de enxeñaría hidráulica con séculos de historia. Esta visita única guíanos a través de diferentes galerías subterráneas e antigos acuedutos que, desde tempos remotos, conduciron a auga á cidade.
Pazo e igrexa de Vilabade (Castroverde)
Coñecida como a “Catedral de Vilabade”, a igrexa de Santa María foi mandada construír en 1467 por Fernando de Castro como panteón familiar ao carón do seu pazo. Un tesouro do Camiño Primitivo vinculado a fi guras históricas como Diego Osorio, que foi Virrei de Nova España.
Mazo de Ferreiravella (Riotorto)
En Riotorto os ferreiros manteñen viva unha tradición milenaria. Nesta visita descubrimos o funcionamento do mazo —ese martelo xigante que doma o metal— e a mestría artesá necesaria para forxar as famosas fouces e coitelos da zona.
Cova dos Mouros (Baleira)
Un dos tesouros arqueolóxicos máis sorprendentes descubertos recentemente en Galicia. Este abrigo rochoso garda nas súas paredes pinturas prehistóricas de cor vermella con trazos angulares e figuras antropomorfas que redeseñan o mapa da arte rupestre galega.
