TORRE DE CONTROL MARÍTIMO
Desde este referente da arquitectura contemporánea coruñesa, erguida en 1995, diríxese o tráfico dunha das áreas máis activas do Atlántico. A súa silueta vangardista, inconfundible no skyline herculino, agocha un interior cheo de actividade e unha das panorámicas máis espectaculares e descoñecidas da cidade.
SINAGOGA 4
No interior da Cidade Vella agóchase un dos achados máis fascinantes da historia recente da cidade. Unha sorprendente cisterna de auga que puido funcionar como baño ritual xudeu (mikvé) ou alxibe. A visita permitiu coñecer de primeira man este elemento excepcional do patrimonio arqueolóxico, o estado das investigacións e os proxectos de valorización futuros.
FÁBRICA DE ARMAS
O futuro tecnolóxico de Galicia constrúese sobre as antigas instalacións da Fábrica de Armas, unha das industrias máis emblemáticas da Coruña. Unha auténtica urbe dotada con naves de produción, comedores, escola, teatro e cine para os seus traballadores, que renace para converterse na Cidade das TIC.
IES EUSEBIO DA GUARDA
Tras a súa impoñente fachada, este faro da educación coruñesa sorprende con lugares inesperados como as súas monumentais escaleiras, o Salón de Actos, aulas que tras ladan cen anos atrás ou o espazo dun observatorio meteorolóxico, pioneiro na cidade.
Polas súas aulas pasaron figuras tan relevantes como Ricardo Carballo Calero, Casares Quiroga ou Camilo Díaz Baliño. Descubriremos o lugar onde un neno chamado Pablo Picasso iniciou a súa formación artística.
Biblioteca da Casa do Consulado
A Casa do Consulado é un edificio neoclásico cun singular patio de influencia andaluza que custodia unha das bibliotecas máis fermosas e antigas da cidade. Catalogada como a fundación cultural privada máis antiga de España, os seus andeis gardan tesouros de valor incalculable: desde raros incunables, manuscritos de Quevedo ou obras orixinais do polígrafo ilustrado José Cornide.
PAZO PROVINCIAL
Construído en 1948 como hotel de luxo, este edificio de corte clasicista é actualmente sede da Deputación da Coruña. Neste itinerario descubriremos o seu maxestoso Salón de Plenos, unha impresionante colección pictórica e a terraza con vistas ao porto que coroa o edificio.
TEATRO COLÓN
No ano 1948 naceu como un “teatro-cine” nunha Coruña que vibraba coa sétima arte. Baixo o deseño de Jacobo Rodríguez-Losada, foi o escenario de estreas míticas e o fogar do Ballet Rey de Viana. No percorrido exploramos as tripas dun auténtico templo do espectáculo
MUSEO DE BELAS ARTES
Coñecemos os interiores deste edificio de Manuel Gallego Jorreto, Premio Nacional de Arquitectura en 1997, erguido sobre o solar do antigo convento das Capuchinas. Nesta visita iremos máis alá das salas expositivas para adentrarnos no lugar onde as pezas de arte recuperan a súa alma en mans expertas.
Igrexa de San Domingos
No corazón da Cidade Vella érguese este templo e convento de orixe medieval, arrasado en 1589 durante o asedio de Sir Francis Drake e reconstruído posteriormente intramuros. A súa igrexa acolle elementos tan singulares como unha torre barroca que semella torcida, a impoñente cúpula que se eleva 26 metros sobre o cruceiro e un extraordinario órgano do mestre Mariano Tafall, que puidemos ver de preto nesta visita especial.
TORRE HERCÓN
A Torre Costa Rica ou Torre Hercón, construída entre 1973 e 1975 na Coruña, é o edificio máis alto de Galicia cos seus 119 metros. No momento da súa inauguración, este emblemático rañaceos de formigón chegou a ser o segundo máis alto de toda España. Na visita secreta quedamos fascinados coa súa arquitectura brutalista e coas vistas desde o máis alto, accedendo a unha das vivendas, á delegación da Coruña da CRTVG e á azotea, guiados polo arquitecto autor do edificio José Antonio Franco Taboada.
