EL CORREO GALLEGO
Por primeira vez, abrimos as portas desta xoia arquitectónica, recentemente adquirida polo Concello de Ferrol. O edificio, antiga sede de El Correo Gallego, destaca pola súa elegancia e orixinalidade. Un espazo imprescindible para descubrir o legado do arquitecto Rodolfo Ucha que transformou o Barrio da Magdalena nun referente do modernismo en Galicia.
PARADOR E IGREXA DE SAN FRANCISCO
Sobre o espazo que ocupaba o antigo mosteiro franciscano do século XIV, hoxe conviven a igrexa de San Francisco e o Parador de Turismo. Este enclave común, reconvertido na Ilustración e no século XX, combina a maxestosidade neoclásica do templo coa sinxela arquitectura rexionalista do Parador. Un miradoiro excepcional sobre o Arsenal e a ría.
SEGREDOS DO ARSENAL
Os muros do Arsenal acollen no seu interior, espazos e lugares poucas veces visitables. Nesta visita tivemos a oportunidade de traspasar a Porta do Parque e coñecer algúns deses lugares de acceso restrinxido, que completan a historia de Ferrol.
faro do cabo prior
O faro do Cabo Prior leva en funcionamento dende o ano 1854. A súa luz e sereas guían dende entón aos mariñeiros que navegan a Costa Ártabra, mais tamén conserva no seu interior historias e relatos de todos aqueles que viviron neste edificio situado nunha paisaxe impoñente.
COLEXIO COMPAÑÍA DE MARÍA
Desde 1889, foi un dos primeiros centros dedicados ao ensino feminino no Barrio da Magdalena. Se algunha vez tiveches a curiosidade de entrar neste impoñente edificio, esta é a túa oportunidade.
ARQUIVO INTERMEDIO MILITAR DO NOROESTE
O Baluarte do Infante foi un dos puntos defensivos da muralla da cidade de Ferrol, posteriormente pasou a ser o cuartel de artillería e a día de hoxe acolle os fondos do Arquivo Intermedio Militar do Noroeste.
ESTACIÓN NAVAL DA GRAÑA
A través do túnel da Graña accedemos á Estación Naval, que se comezou a construír no século XVIIII sendo o xerme do Arsenal Militar. A día de hoxe, no espazo ten a súa sede a ESENGRA (Escola de Especialidades da Estación Naval da Graña), un dos principais centros formativos da Armada.
CASA ANTÓN
Unha das obras referentes de Rofolfo Ucha na cidade e que combina elementos modernistas con outros propios do neoeclecticismo. Foi construída como vivenda unifamiliar para o que fora alcalde de Ferrol Emilio Antón Iboleón, e hoxe é parte do Colexio Jesús Maestro
CASA DO CONCELLO
O Palacio Municipal abre as súas portas para permitirnos coñecer o seu interior, os salóns nobres, a súa colección de arte e os espazos nos que se decide a vida política da cidade.
