CONVENTO DO CARME
Fundado no século XVIII pola madre María Antonia de Jesús como o primeiro cenobio de Carmelitas Descalzas en Galicia, o convento do Carme abriu por primeira vez as súas portas ao público na Semana do Patrimonio Invisible. Unha grande oportunidade para adentrarse nun antigo espazo de clausura —hoxe habitado por monxes carmelitas contemplativos—.
MANANCIAIS DE COMPOSTELA
Baixamos ás profundidades da terra para adentrarnos nos antigos mananciais de auga das fontes históricas da cidade medieval da Fonte Branca e Ponte Mantible. Unha experiencia inesquecible.
ESCAVACIÓNS DA CATEDRAL
Baixo o chan da catedral agóchanse as orixes da cidade apostólica. Unha experiencia única para camiñar sobre as camadas superpostas de historia, que nos mostran a evolución do “Locus Sanctus” a través dos seus camposantos, da cerca de Cresconio e dos primeiros templos dedicados ao fillo do Trono.
PAZO ARCEBISPAL
Facendo ángulo coa porta da Acibechería localízanse as dependencias do pazo arcebispal, antigamente coñecido como o “provisorato”, hoxe sede da curia. Tras a súa fachada decimonónica agóchanse algunhas sorpresas como a espectacular escaleira de honra que comunica coa cámara arcebispal.
CASA DA PARRA
A fermosa fachada barroca desta casa é un emblema na praza da Quintana. Pero, que agocha esta xoia arquitectónica? Un percorrido polo seu interior permitiranos
coñecer os seus espazos e as sorprendentes descubertas arqueolóxicas realizadas con motivo da súa rehabilitación.
MUSEO DO POBO GALEGO – SAN DOMINGOS DE BONAVAL
Descubrimos espazos non visitables do antigo convento de San Domingos de Bonaval, coñecendo o gran labor que existe detrás das salas de exposición do Museo do Pobo Galego, unha institución herdeira do Seminario de Estudos Galegos. Sorprendémonos cos detalles da recente rehabilitación da ala sur, os seus arquivos, as súas bibliotecas históricas, o vivo Arquivo do Patrimonio Oral da Identidade e as inusuais vistas da cidade.
Claustro gótico de salomé
A visita secreta desvelounos os segredos agochados no adro da igrexa de Santa María Salomé, fundada no século XII polo chanceler Paio Abade. Percorremos os interiores dalgunhas das vivendas máis antigas da cidade, onde quedaron engulidos os arcos apuntados do seu esquecido claustro gótico —vencellado a un antigo hospital de mulleres—.
Tivemos a oportunidade de contemplar de preto a súa valiosa colección de canzorros medievais e de coroar a experiencia subindo ao campanario no solpor, desfrutando dunhas vistas privilexiadas e inesquecibles sobre os tellados da rúa Nova e da zona vella compostelá.
AUDITORIO DE GALICIA
Entramos nas partes menos coñecidas deste edificio deseñado polo estudio de Julio Cano Lasso en 1988. De carácter urbano e pechado cara á Praza do Burgo das Nacións, ábrese á natureza no Parque da Música. O volume dominante do escenario reflíctese nunha lámina de auga, converténdose nun potente referente visual da cidade.
PAZO DE BENDAÑA – FUNDACIÓN GRANELL
Mandado construír polos marqueses de Bendaña e rematado en 1759, este pazo urbano é un dos grandes expoñentes do barroco compostelán, obra de Clemente Fernández Sarela. Un percorrido polo seu interior permite escoitar os ecos do seu pasado fidalgo e acceder a espazos de acceso restrinxido do que hoxe é museo de Eugenio Granell.
AS ORFAS
Fundado a finais do século XVI polo arcebispo Juan de Sanclemente para acoller e educar nenas desamparadas, o colexio e convento das Orfas garda miles de historias á beira da antiga muralla da cidade, da que aínda conserva un torreón. Unha oportunidade para descubrir a pegada de grandes mestres como Melchor de Velasco, Domingo de Andrade ou Fernando de Casas Novoa, e admirar a Inmaculada de Gambino que preside o seu altar maior.
PAZO DE RAXOI
Fechando a Praza do Obradoiro fronte á fachada da Catedral, érguese esta marabilla do neoclásico francés deseñada polo enxeñeiro Charles Lemaur en 1766. Nesta visita accedemos ás dependencias municipais e coñecemos o resultado das súas últimas obras.
