encoro de belesar (chantada)
A colosal obra de enxeñaría do Encoro de Belesar impón desde fóra, pero imaxina poder acceder ás súas entrañas. Unha visita excepcional para descubrir a historia e funcionamento dunha das maiores centrais hidroeléctricas do país.
mananciais de mondoñedo
Un tesouro agochado de enxeñaría hidráulica con séculos de historia. Esta visita única guiarate a través de diferentes galerías subterráneas e antigos acuedutos que, desde tempos remotos, conduciron a auga á cidade.
san vicente do pino (monforte de lemos)
Coroando Monforte de Lemos, o que foi mosteiro de San Vicente do Pino é un conxunto monumental emblemático. Esta visita permitirache explorar este espazo na súa totalidade, incluíndo a súa maxestosa igrexa e o actual Parador de Turismo.
pazo de ferreiroá (pantón)
Unha ocasión única para entrar nun pazo particular, con obxectos e estancias que nos trasladan aos tempos de esplendor da fi dalguía galega. Na súa adega mesmo se rodou algunha escena do filme A esmorga.
cova de santalla de lóuzara (samos)
Comparte moitas características coas grutas calcarias da veciña serra do Courel, na mesma área xeolóxica. No seu interior, o tempo e a auga labraron espectaculares formacións cársticas ao longo de milenios, conformando un atractivo e sorprendente espectáculo visual.
seminario de santa catarina (mondoñedo)
O Real Seminario Conciliar de Santa Catarina é o edificio máis grande de Mondoñedo. Na impoñente arquitectura dun dos seminarios máis antigos, agóchase unha sorpresa: a súa extraordinaria biblioteca.
mosteiro de san salvador (lourenzá)
Nesta visita, terás a oportunidade de explorar a súa maxestosa igrexa e o seu claustro, onde a vida monástica deixou unha fonda pegada. Descubrirás o sepulcro de mármore do Conde Santo, unha peza do século XI con lendas de peregrinación, e un espectacular relicario do século XVII.
igrexa do hospital (o incio)
Unha igrexa agochada feita de mármore e pedra calcaria, san Pedro Fiz garda moito máis no seu interior. Vaste sorprender coas súas xoias de arte medieval e coas historias de cabaleiros da Orde Hospitalaria de San Xoán de Xerusalén.
ferraría de penacova (bóveda)
Ver unha ferraría en funcionamento é todo un privilexio. Poucas quedan en Galicia que aínda accionen os seus mazos coa forza da auga. O ferreiro Manuel acóllenos en Penacova para que poidamos sentir de novo o son e a calor deste interesante conxunto etnográfico e de patrimonio industrial.
